പതിനെട്ടുപുരാണങ്ങളിലൊന്ന്. കുരുക്ഷേത്രത്തിനു സമീപമൊഴുകുന്ന ദൃഷധ്വതീനദിയുടെ തീരത്തു നടക്കുന്ന യാഗത്തിൽ എത്തിച്ചേർന്ന വ്യാസശിഷ്യനായ രോമഹർഷണൻ മുനിമാരോടു വിവരിക്കുന്ന രീതിയിലാണ് വായുപുരാണത്തിന്റെ ആവിഷ്കാരം. ശിവന് പ്രാമുഖ്യം നൽകുന്ന വായുപുരാണത്തിൽ അനേകം കഥകളും സ്വർഗ്ഗ - നരകവർണ്ണനകളും അടങ്ങിയിരിക്കുന്നു. പ്രക്രിയാപാദം, ഉപോദ്‌ഘാതപാദം, അനുഷംഗപാദം എന്നീ മൂന്നു പാദങ്ങളിലായി സൃഷിപ്രകരണം, മന്വന്തരവർണ്ണനം, പാശുപതയോഗം, ഋഷിവംശാനുകീർത്തനം, ജംപുദ്വീപവർണ്ണനം, ഭുവനവിന്യാസം, ചതുർയുഗാഖ്യാനം, ശ്രാദ്ധകല്പം. ഗയാമാഹാത്മ്യം തുടങ്ങിയ അദ്ധ്യായങ്ങൾ. വിവിധ ജനപദങ്ങളെയും ജനസമൂഹങ്ങളെയും ആവാസവ്യവസ്ഥകളെയും ജീവിതരീതികളെയും കുറിച്ചു വായുപുരാണം നൽകുന്ന വിവരങ്ങൾ പഠനാർഹങ്ങളാണ്.