മലയാള കവിതാപാരമ്പര്യത്തെ നന്നായി ഉള്‍ക്കൊണ്ട ഒരു കാവ്യസംസ്‌കാരത്തിന്റെ ബലിഷ്ഠമായ അടിത്തറയിലാണ് ശാന്തി ജയകുമാറിന്റെ കവിതാരചന. മലയാളത്തിന്റെ ഈണവും താളവും ഉള്‍ക്കൊണ്ട കാവ്യഭാഷയിലാണെങ്കിലും ആധുനിക – ആധുനികോത്തര കാവ്യസംസ്‌കാരത്തിന്റെ മുദ്രകളും ഈ കവിതകളില്‍ സമൃദ്ധം. പദ്യത്തിലും ഗദ്യത്തിലും തികഞ്ഞ സ്വാഭാവികത. അതോടൊപ്പം അനുഭവലോകത്തിന്റെ അനിവാര്യമായ സങ്കീര്‍ണ്ണത. ചിലപ്പോള്‍ ധ്വനിസാന്ദ്രത. ചിലപ്പോള്‍ വാചാലത, ചിലപ്പോള്‍ ലയാത്മകം. ചിലപ്പോള്‍ സംഘര്‍ഷാത്മകം. ഈ കവിതകളില്‍ തെളിയുന്ന വ്യക്തിത്വത്തെ സ്ത്രീയെന്നോ പുരുഷനെന്നോ വ്യവച്ഛേദിക്കുക ദുഷ്‌കരം. അനുഭവത്തിന്റെ ലിംഗഭേദാതീതമായ സങ്കീര്‍ണ്ണതകളെ സ്വാംശീകരിക്കാന്‍ പലപ്പോഴും വെമ്പുന്ന വാങ്മയം. ഈ കവിതകളില്‍ തീവ്രമായ ഒരു പ്രതിജ്ഞയുണ്ട്. തീക്ഷ്ണമായ ഒരു വാഗ്ദാനമുണ്ട്.