ഏറ്റവും പുതിയ കാലത്തെ മനുഷ്യനിലും പുലരുന്ന ആദിമ മനുഷ്യന്റെ പേടിസ്വപ്നങ്ങളുടെ തുടർച്ചകളാണ്, കാന്താരത്തിലായാലും നഗരകാന്താരത്തിലായാലും ഈ കഥാകൃത്ത് പിടിച്ചെടുക്കാൻ ശ്രമിക്കുന്നത്. വിഭ്രമദൃശ്യങ്ങളും അവിശ്വസനീയ സംഭവങ്ങളുമൊക്കെ, അഹേതുകമെങ്കിലും ജീവിതത്തിന്റെ യാഥാർഥ്യങ്ങളിൽ പെടുന്നു എന്ന തിരിച്ചറിവാണ്, അതുകൂടി ചേർന്നതാണ് മനുഷ്യജീവിതവും മനുഷ്യമനസ്സും എന്ന ഉൾക്കാഴ്ചയാണ് ഈ കഥകൾ പകരുന്നത്. – ഡോ. കെ.എസ്. രവികുമാർ
സാക്ഷിയുടെ നിഴൽ, നിങ്ങൾക്കുവേണ്ടി ഒരു മരണം, വെളുത്ത കൂടാരങ്ങൾ, ചാവടി, രാജഗോപാലൻ നായർ, കർക്കിടകം, അടയാളങ്ങൾ, അരങ്ങ്, മരപ്പേടി… തുടങ്ങി ജീവിതത്തിന്റെ പ്രഹേളികാ സ്വഭാവവും മൃതബോധത്തിൽ നിന്നുണരുന്ന ആദിമഭീതികളും യാഥാർഥ്യത്തിലേക്കടുക്കുന്തോറും അയഥാർഥമായിപ്പോകുന്ന സ്വപ്നസഞ്ചാരങ്ങളും അന്തർധാരയാകുന്ന പതിനേഴു രചനകൾ.